Pagdami ng umano’y ‘freelance’ sex workers sa Baguio City, ikinabahala

Ikinababahala ng Baguio City Health Office ang pagdami ng mga tinatawag na “freelance” sex workers sa lungsod. Hindi umano namomonitor ang kilos at kalusugan ng mga ito na maaaring maging dahilan ng paglaganap ng sexually transmitted disease o STD.

Sa ulat ni Charice Victorio sa GMA News TV’s “Balita Pilipinas Ngayon,” ipinaliwanag na kumpara sa mga “regular” sex workers sa ilang night spots sa lungsod, ang mga “freelance” sex workers ay hindi umano sumasailalim sa regular check-up o lingguhang pagsusuri sa kanilang kalusugan.

Batay umano sa pinakahuling surveillance na ginawa ng Baguio city Health Office, tinatayang aabot umano sa mahigit 1,000 ang freelance sex workers na gumagala sa gabi sa ilang lugar sa lungsod.

Karamihan sa mga ito ay nagmula pa raw sa mga karatig lalawigan at mayroon ding nagmula sa Visayas at Mindanao.

Dahil pagala-gala lalo na sa ilang lugar, nahihirapan daw ang City Health Office na mamonitor ang mga sinasabing sex workers.

Ang ganitong kalakaran ang isa raw sa mga sanhi ng pagkalat ng sexually transmitted disease o STD.

Base umano sa 2013 data ng City Health Office, tinatayang aabot sa 300 ang kaso ng STD cases sa lungsod at kabilang dito ang gonorrhea o syphilis.

Gayunpaman, sinabi ng lokal na pamahalaan na may mga proyekto na raw ang lokal na pamahalaan para mabigyan ng mas disenteng kabuhayan ang mga sex worker na nais mag-iba ng trabaho. — FRJ, GMA News