Kritikal sa pambubugbog ng amo (Part 1)

By Armida Rico, Abante, June 30, 2016

Hindi lang ang pamilya ng isang Pinay domestic helper (DH) ang humihingi ng tulong, maging ang mga kaibigan nito ay nanawagan sa tanggapan ng Department of Foreign Affairs (DFA) at Overseas Workers Welfare Administration (OWWA) na tulungan itong makauwi ng bansa dahil kasalukuyan itong nasa kritikal na kondisyon sa isang pagamutan sa Riyadh, Saudi Arabia dahil sa pananakit ng kanyang amo.

Ayon sa isang kaibigan, hindi na nagpabanggit ng pa­ngalan, nanatili pa rin sa Prince Mohammed Bin Abdulaziz Hospital ang kanyang kaibigan na si Analyn Tubang-Sy.

Nauna nang humingi ng tulong sa DFA at sa OWWA ang hipag ng OFW na si Lani Tubang na kung saan sinasabi nitong nasa kritikal na kondisyon si Analyn dahil halos mabasag ang ulo nito matapos paluin ng kanyang employer sa ulo.

Si Sy, residente ng Brgy. Calangcang, Makato, Aklan, ay may dalawang taong nang nagtatrabaho sa Riyadh, Saudi Arabia bilang domestic helper.

Base sa nakalap na impormasyon ng mga kaibigan ni Sy, ikinulong umano sa bodega, hinampas ng matigas na bagay at iniuntog pa ang ulo nito sa pader ng kanyang employer na naging dahilan upang magkaroon ng head trauma kaya’t hanggang sa ngayon ay nasa pagamutan pa ito. (Itutuloy)