Mekaniko, napisak ng inaayos na bus

By Juliet de ­Loza-Cudia, Abante, June 26, 2016

Pisak ang mukha at durog ang ulo ng isang 26-anyos na mekaniko matapos madaganan ng kinukumpuning bus nang kumalas ang nakakalang na ‘jack’, kahapon ng umaga sa parking a­rea ng Dilan Liner sa may Sampaloc, Maynila.

Namatay noon din, ang biktimang si Zandro Soria, 26, stay-in mechanic sa Dilan Liner na matatagpuan sa 961 Dos Castillas corner Florentino Street, Sampaloc, Maynila.

Ayon sa imbestigasyon ni SPO2 Jonathan Bautista, ng Manila Police District-homicide section, naganap ang insidente dakong alas-7:30 ng umaga sa nabanggit na lugar.

Sa pana­yam kay Francisco Ferrer, 51, kasamahang mekaniko ng biktima ,kapwa sila nasa ilalim ng bus at kinukumpuni ang may singaw na air bag ng bus na may plate number BVA-405 nang mangyari ang insidente.

“Nasa may bandang gitna ako, tapos si Zandro nasa may malapit sa airbag, nagulat na lang ako nang may ku­malabog, tapos ­naipit yong a­king tagiliran, kaya mabilis akong gumapang papalabas ng bus, paglingon ko nakita ko si Zandro patay na at nadaganan ng bus yong mukha”, ayon kay Ferrer.